Katisting naka anang lipay kaayo ka kay productive imong adlaw?

Kanang  hangtud sa boarding house gasulat ra gyapon ka kay gapusot-pusot imong idea, unya kay igang man ug dili man tsada ang signal sa internet, nigawas ka sa imong kwarto dadto nagpadayun ug sulat pero kana bitaw nakapantulog naka - kanang mubo kaayo nga short unya sleeveless na nipis?

Lami na kaayo imong sulat diha oh, unya kay gi  uhaw man.  Nangita ka sa imong yabi para kwaon imong tubig sa sulod sa kwarto. Pwerte nimong hikap-hikap sa imong bulsa ug tan-aw sa lamisa ug sa ubos sa lamisa, pero wala gyud kay yabi nga nahiwaran, imposible pud naa sa kilid-kilid kay naa may gatangag nga puti ug daku nga pito, pito nga kanang pang pprrrt..

Nibalik  ka sa kwarto, gahandum nga wala nimo na lock ang kwarto. Apan,  wala gyud, locked man gyud bisag unsaon ug tuyok-tuyok ang doorknob.

Nibalik ka sa sala, nangita ug pama-agi. Gi textan nimo ang gabantay sa boarding house  pero lain na tao ang nitubag, ingani pa gyud ug text oh,  "Tulog na siya. Adtoa nalang ang tag-iya sa ilang balay kay naa dadto ang duplicate."

Unsa lugar imong itubag ani kung duha palang ka ka-adlaw nagpuyo sa boarding house, unya wala ka kaila sa tag-iya?  Nitubag nalang tawon ka ug, "Ok, salamat. Ugma nalang."

Pero sa imong hunahuna, asa kaha ko matulog ani? Naglingilingi ka  sa sala, apan wala kay makita na pwede matulogan unya daghan pa gyud lamok.

Sa sige nimo ug huna-huna unsaon, maayo nalang imong utok ga andar pa, nakahunahuna  ka ug text sa kauban sa trabaho, para makitulog. Maayo nalang  kay wala nabilin  ang cellphone sa sulod sa kwarto, kay kung wala pa, ambot nalang gyud.

Ang daku nga bulabog, mosakay ka ug taxi nga wala kay kwarta unya ang pinaka pait, dayo ka sa lugar, dili ka kabalo sa mga dalan kung asa padulong.  Pero mamahala nalang ka kay sa magbuntag ka nga galurat imong mata ug malamukan  Sus, unsaon nalang kaha noh, kung imong kauban sa trabaho kay wala, kay nagbyahi?

Katisting naka ana? Ako bai, grabe, katisting ko na, karun lang gyud.

Dili man diay sayon. Busa kamo, dal-a gyud pirme ang yabi. Ayaw gyud pa tanga-tanga.